لغز (البريء)
اضافة الموضوع بتاريخ 16 فبراير 2010 الساعه 1:51 ص
تعود عاطل ان يستقبل أصدقائه (فاصل) و(عاثر) و(وحدي)في منزله الكائن في حي التجار يوميا حيث يقضون وقتهم في لعب الورق
او مشاهدة التلفاز وكانوا يسهرون حتى ساعات الصباح الأولى نظرا لسفر زوجة عاطل وأبنائه الى عائلتها في الرياض :
عاطل : ياخي ملينا من البلوت نبي نغير جو من جد من جد أبي أغير جو .
عاثر : صار لي يومين أقولك خلنا نسافر وأنت ماتبي …ياخي تغيير الجو يعني تغير المكان والناس .
عاطل : ياخوي الحرمة خذت الجواز معها وشلون تبيني أسافر.
عاثر : وتعترف بعد أنت ووجهك ……طيب نروح البحرين والا دبي وهذي مايحتاج لها جواز .
وحدي : دبي وين ياعمي هذاك اول الحين ماتخشها الا بالجواز لانهم منعو البطاقة بأثر رجعي !!
خلنا على البحرين بس نشوف أفلام ونتمشى ونرجع .
عاطل (بحرج) : طيب اقدر امر من جسر البحرين بصورة البطاقة ؟؟!
عاثر (بنرفزه) : لاتقولي ان الحرمة ماخذه البطاقة بعد ؟؟
عاطل (بابتسامه غبيه) : أي والله قسم .
عاثر :وأنا اقسم انك غبي..تخلي حرمه تلعب فيك .
عاطل : ياخي خلها تلعب فيني دامها تصرف علي وانا جالس بالبيت .
وحدي : ماقول الا الله لايبلانا …وين فاصل عنك اليوم ؟
عاطل : فاصل جايه ولد عمه من الديره صد ورد ورايحين السوق .
وحدي : أي ولد عم ؟
عاطل : والله مدري بس يناديه ابوفلته .
عاثر : لايكون ولد عمه اللي توه طالع من السجن .
عاطل : افاااا ..وش مسوي ؟؟!!
عاثر : الشركة اللي يشتغل فيها شكو فيه انه مختلس مبلغ وماطلع من السجن الا يوم سدد المبلغ .
عاطل : الله يفكنا من شره لايجيبه الدلخ فاصل هنا محنا بناقصين .
وبعد فتره يدخل فاصل ومعه ضيف جديد .
فاصل : اعرفكم بولد عمي ابوفلته .
عاطل بامتعاض : هلا….هلا حياك .
وحدي : حياك الله يابوفلته وكفاره ياقدع ههههههه .
ابوفلته : أي والله انك صادق ياخوي لاجيت الشرقية من الانتعاش أحس اني كنت بسجن .
عاطل (يحدث نفسه) : وش عنده اللي ماكان مسجون !!
فاصل : وش هالعود الزين ياعاطل ؟ شكله غالي من ريحته .
عاطل : ولا غالي ولا شي هذا شريته من باكستاني عند المسجد اللي ورى بيتييبيع التوله بميتين ريال
وجلست يومين اكاسر فيه الين شريت منه التوله بعشرين ريال .
وحدي :كسر خاطري الباكستاني وكنت بعطيه مية ريال من جيبي بس منعني عاطل .
عاثر : والله من دلاختك يوم تفكر تعطيه …ذولي ماينضحك عليهم تلاقي العود مغشوش والا ماباعه بهالسعر .
عاطل : اصلا مارضى يخفض المبلغ الا يوم قلت له ان زوجتي بتشتري الكميه كلها إذا رجعت من السفر وواعدته يجيني البيت بعد أسبوع .
ابوفلته :والله ان ريحته طيبه ليتني لاحق عليه .
وحدي : بكره تعال صل المغرب عندنا وبتلاقيه مرتز قدام المسجد .
ابوفلته :انا ماشي الديره اليوم والله .
عاطل باستهزاء : عندك فلوس انت ؟
ابوفلته باستغراب ثم ضحكه : هههههههههه أكيد عندي طبعا !!
عاطل : خلاص هات 100 وخذ التوله حلالك .
ابوفلته :ماعندي مشكله بالفلوس لكن ماودي اخذه منك .
عاطل : لا ماعليك …. اذا رجع الباكستاني زوجتي بتعوضني هههههههه .
ابوفلته :اجل دام كذا اتفقنا .
عاطل (يحدث نفسه) : تعااال هذا فلوسه حرام وشلون اخذ منه ….أقول يابوفلته بعطيك العود بس بشرط….ابي فاصل اللي يدفع .
ابوفلته :وش دعوى ياخوي انا ماارضى .
عاطل (بخبث) : كذا لعانه انا ابي اخسر فاصل ههههههه .
فاصل : خلاص خلاص خذ الميه وهات العود اخلص علينا .
وأثناء حديثهم يدخل عليهم جار عاطل الملاصق لبيته :
الجار : مساكم الله بالخير .
عاطل : هلا بوحمد حياك الله تفضل .
الجار : الله لايهينك ياعاطل اذا ممكن بعد اذنك تسكر باب الملحق لان أصواتكم واصله لبيتي !!
عاطل : لا ياخوي ماني مسكر الباب نبي الهوا يخش علينا شوفة عينك مافي شبابيك .
الجار : طيب افتح الباب اللي يودي للحوش وبيجيك هوى !
عاطل : لا انا ابي أشوف الرايح والجاي ماني مسكره اسمح لي .
الجار :طيب الله يجزيك خير ماقصرت ..فمان الله .
عاطل : لو انه جاي بأدب كان سكرت الباب .
وحدي : وشوو!! مابقى الا يبوس يدك وتقول جاي بأدب..امرك غريب !!
عاطل : ياخوي انا حر وش تبي انت.
يسهر الجميع حتى الصباح ثم يودعهم ابوفلته بحجة عودته الى قريته ويشكر عاطل على حسن استقباله ويدخل عاطل منزله متجهاً الى غرفة نومه فيشاهد نافذة الصالة مفتوحة ويذهب لاغلاقها فيشاهد اثار قدم من الطين على الأرض وينتابه الخوف ثم يخرج مسرعاً من البيت ويدخل الملحق ويغلق الباب على نفسهم يتصل على فاصل ويخبره بما حصل ويطلب منه العوده بأسرع وقت,وعندما يصل يتجه الاثنان الى داخل البيت ببطيء ,وبمجرد دخولهما غرفة النوم اكتشفا ان محتويات الخزنه اختفت وصندوق مجوهرات زوجة عاطل اختفى فيجن جنونه :
عاطل يضرب بيده على رأ سه : ياويلي من (ساطره) بتذبحني ياويلي منها ماني بجالس بالديره بهاجر ..بهاجر .
فاصل : امحق رجال والله ؟؟! اسكت خلنا نعرف نتصرف .
عاطل :وش تتصرف مجوهرات ساطره انسرقت يعني انا قيم اووفر .
فاصل : منت بهين ياكراش ..ماعليك بترجع ان شاء الله الحين بتجي الشرطه وتحل الموضوع .
يصل أفراد الشرطة ويظهر علي محياهم التعب والكسل من عناء العمل :
الشرطي (يتثاوب) : خير يابو الشباب ؟
عاطل : بيتي انسرق ياطويل العمر تكفى مابي الفلوس بس أبي المجوهرات .
الشرطي : هذا خامس بيت ينسرق اليوم بنفس الحي .
عاطل : طيب لقيتو السارق حقهم ؟
الشرطي : عمرك سمعت بحرامي ينمسك بهالديره ؟
عاطل : طيب والحل انا ابي المجوهرات تكفون قبل مايكمل الأسبوع .
الشرطي : أنت تشك بأحد ؟
عاطل : لا والله ماشك بأحد ولا عندي أعداء .
الشرطي : خلاص اجل بنرفع البصمات الحين ونبدا بالبحث عن السارق وهذا وجهي اذا لقيناه .
عاطل : وشلون هذا وجهك !!!
الشرطي : احم .اقصد احفظ وجهي عشان لاجيت المركز تعرفني .
عاطل : لحظه لحظه ….عرفت من الحرامي !!
الشرطي :الله يبشرك بالخير …منهو ؟
يمسك عاطل برقبة فاصل : ولد عم هذا هو اللي سرقني .
فاصل : وش تقول انت يامجنون !!
الشرطي : من هو ولد عمه وليش هو بالذات ؟
عاطل : لانه طالع من السجن في جرايم نهب واختلاس وقتل وتذكرت وإحنا سهرانين طلب يروح دورة المياه مرتين .
أكيد المرة الأولى سرق بيتي والمرة الثانية سرق البيوت الاربعه لان الأولى رجع بسرعه اما الثانية تأخر بالرجعة .
فاصل : تعوذ من الشيطان ياعاطل واعقل ولد عمي مايسوي هالحركات وبعدين من قالك انه طالع من السجن .
عاطل : عاثر هو اللي قالي عنه الحرامي ابن الحرامي مايكفيه انه اختلس فلوس من شغله وجاي يكمل على مجوهرات ساطره الضعيفة .
فاصل : يبن الحلال هذاك اخوه اللي طلع من السجن وكانت بسبب ديون موب عشان اختلاس وقتل حرام عليك ياشيخ .
يطلب الشرطي من فاصل معلومات عن ابن عمه ابوفلته ومكان تواجده ويتم القبض عليه في قريته وبعد عدة تحقيقات يتم تبرئته ويطلق سراحه .
السؤال : اذا لم يكن ابوفلته السارق فمن يكون ياترى ؟
– انتهى –
الجائزه ستكون كالعادة تحريك عقلك أكثر وأكثر
شكراً للمصورة حصة الدوسري على الصورة الحصرية
فهد العبداللطيف
حسن القحطاني
21 فبراير, 2010 | 17:02معروفة منو السارق ههههههههههه وانا واثق اني مو بذكي لكن اجواااااااااااااااااااااااااااااااااااااااااااااااااب الجار لانة جاي يتاكد من الموقع بوجود الدلوخ
عبد الله
21 فبراير, 2010 | 17:06اممممممممممممم واللهو اعلم انوه الباكستاني هو السروقي يمكن يبي يرد حق العود ال خذاو بعشرين فراح سرق المجوهرات :$
Soso
21 فبراير, 2010 | 17:26[ أبو حمد ] !
red roza
21 فبراير, 2010 | 18:59قصه حلوه.. تعبر عن حال المجتمع
اتوقع الجار من القهر
او عاثر لانه كذاب
جبرني الوقت
21 فبراير, 2010 | 19:32هو الــجـآر
عبد الرحمن
21 فبراير, 2010 | 19:39انا اعتقد ان الشرطي هو السارق .
ملاك
21 فبراير, 2010 | 19:58امممم ممكن الباكستاني، لانه يعرف البيت خالي
GAQ
21 فبراير, 2010 | 20:12السلام عليكم ورحمة الله وبركاته ..
ما شا الله تبارك الرحمن .. أنت الوحيد من القروب اللي اقرا قصصه مع احترامي للجميع .
قصصك يونييك بجد الله يديم علينا وعليك النعمه ,
بالنسبه للجواب تراي داخله متحممسه بلحيل .. يمكن الجاار وإذا مب هو أتوقع الباكستاني ..؟
لا تحرمنا يا رُجــل من الخياال ..
ابومعاذ
21 فبراير, 2010 | 21:31عاثر هو السارق
معاذ
21 فبراير, 2010 | 21:41اتوقع ((عاثر))
حموود
21 فبراير, 2010 | 22:33هاااااااااااا
وش الجوااااااااااااااااب
<<<<<<<<<<<<<متحمس
فهد العبداللطيف
21 فبراير, 2010 | 22:41هلا وغلا اخواني واخواتي واسف جدا على التأخير
الاجابه الصحيحه كانت للاخ عبدالله والاخت ملاك والاخت GAQ لان السارق هو
الباكستاني اللي يبيع العود
اعتذر اذا خيبت ظنكم والف الف شكر على زيارة الموقع
اختي GAQ
كلامك الرائع اسعدني واتشرف به واتمنى ان اكون عند حسن ظن الجميع
تحياتي
سلوى
21 فبراير, 2010 | 22:45انت كاتب موهوب استطعت شد انتباهنا وجذب اهتمامنا
لن اتهجس ولكن عجل علينا ببقية القصة بالانتظار
فهد العبداللطيف
22 فبراير, 2010 | 00:09هلا بك اختي سلوى والف شكر على الاطراء
القصه انتهت والحل هو الباكستاني كما ذكرت سابقا
تحياتي
ابو بندر
22 فبراير, 2010 | 03:45فكره حلوه اهنيك عليها لاكن ملاحظتي انه مافيها تلميح ليش الجواب البكستاني ؟؟ رغم انه قال لرجعت زوجتي اعوضك يعني البكستاني عرف ان الزوجه ماهي متواجده بالمنزل لاكن الزوج موجود معقوله البكستاني يخاف من الزوجه اكثر من الزوج .. تدري وش خطر في بالي ان السارق هو (كراش) لأن فاصل بعد ماعرف بالموضوع قال ؛ منتب سهل ياكراش .. وانت صاحب الموضوع وادرى << يحب يتفلسف بزياده
احترامي ؛ ابو بندر
شخصٌ عَبر هذه آلصفحه
22 فبراير, 2010 | 05:16آلجوآب آلبآكستآني
لآن كل بآكستآني سروق
مو آلجآر ومآفيه تآجر يسرق
ولآ فيه آخويآ يسرقون خويهم
وآلبآكستاني ماخلاه يشتري العود برخيص الا لما عرف ان زوجته مسافره
وغير كذا هم بهالملحق المفترح اربعه وعشرين ساعه
محمد
22 فبراير, 2010 | 12:28ما انسرق ولا شيء زوجة عاطل اخذت الفلوس والمجوهرات وسافرو
[- نااقد غير مثقـف -]
22 فبراير, 2010 | 18:04قصـة بطلـة .. استررعت اهتماامي كما لم يسبق للقصص القصيرة ان تفعـل ..
شسموه .. توقعت السبـيّـكـه اللي انزرف نسى ان زوجته اخذت الاغراض ..
< متعود ع الالغااز الساامجة السقيمه ،
مشكور ع الامتااع ..
< يرفـع قبعـته احترامـاً للكـاتـب ,,
المبسوطه
23 فبراير, 2010 | 15:40مشكوووووووووووووووووووور أخوي
على القصة
بس للحين مافهمت ليش الباكستاني
فهد العبداللطيف
23 فبراير, 2010 | 15:49هلا والله اختي المبسوطه
هناك اكثر من حدث وضعته لابعاد الشبهات عن اغلب الموجودين
يعني مثلا
1 – الجار اللي اغلب الاعضاء قالت انه هو السارق ابعدت الشبهات عنه لاني ذكرت بان عاطل ساكن في حي التجار وحي التجار مايسكنه الا التجار
2 – بينت الصداقه الحميمه بين اصدقاء عاطل واكيد اصدقائه مارح يسرقونه
3 – ابوفلته بينت في البدايه انه مختلس وباخر القصه ذكرت ان بريء والمسجون كان اخوه
4 – زوجة عاطل لن تسرق مجوهراتها
5 – جمله ذكرتها لتسهيل الموضوع على القراء يوم قال عاطل :
اصلا مارضى يخفض المبلغ الا يوم قلت له ان زوجتي بتشتري الكميه كلها إذا رجعت من السفر وواعدته يجيني البيت بعد أسبوع .
عاطل اعطى للبائع فكره ان زوجته مسافره
6 – مشهد دخول الجار وطلب اغلاق الباب كان لايصال فكرة للقاريء ان عاطل واصدقائه مكشوفين بالشارع واي واحد يمر يشوفهم وهذا سهل للسارق ومن عاونه بمراقبتهم ولو خرج احدهم من الملحق سيبلغ السارق
7 – اثار الاقدام والطين لشخص قادم من خارج البيت ودخل من النافذه يعني شخص غريب
8 – الصوره المرفقه بالموضوع قد تساعد في الحل ايضا لان هناك شخص خلف الزجاج مخفي الملامح
التعايش مع القصه اكثر يساهم في معرفة الحل وهذا مافعله من عرفوا الاجابه مع العلم ان اللغز كان اصعب من المنشور ولكن خففت منه للتسهيل والهدف فقط تحريك الذهن وليس تعجيزه
شكرا لك وتحياتي
حموود
24 فبراير, 2010 | 02:48اهااااااا صحيح
الصراحه انا معجب في قصصك
خااااصه القصص فيها الألغاز
ارجو الأكثار منها
ونحن في الانتظار احر من الجمر
فهد العبداللطيف
24 فبراير, 2010 | 16:03تسلم اخوي حمود على الاطراء وابشر من عيوني
some one
3 مارس, 2010 | 17:27الله الله صراحةً اهنيك ..
لغز رائع ..
وبانتظار جديدك .. ان شاء الله