وداعاً أبنتي
اضافة الموضوع بتاريخ 23 يناير 2010 الساعه 1:52 ص
البنت : ادري انك بابا وادري ان هذي ماما .
الأب : وانا ادري انك الغاليه….اقول ماودك تطلعين ؟
البنت : انا بصراحه خايفه اطلع واندم!!
الاب : ليه تندمين بالعكس مالك الا شي يرضيك ويبسطك بس تعالي .
البنت : انا مثلك يابابا احساسي مايخيب ..وانا احس اني بندم .
الاب : قلت لك مالك الا انك تعيشين عيشة اميرات وبشتري لك مملكة العاب وحلويات وادلعك واخليك من احسن البنات .
البنت : خابرتك كريم يابابا لكن كل هذي يبيلها فلوس وانت دايم تقول لماما ودي اعيشك اميره لكني فقير .
الأب : افااااا بدينا بالتجريح ..بس ماعليه على قلبي زي العسل .
البنت : بالعكس بابا راضيه والله بس لاتوعدني بشي منت قده تراني بنت بنشب بحلقك .
الأب : يابنت الحلال والله بدلعك حتى لو ابيع نفسي .
البنت : طيب انا مابي المستشفى الحكومي .لان امي تشتكي من خدمتهم .
الأب : مالك الا تروحين احسن مستشفى باذن الله .
البنت : طيب مممممممم شوف يابابا انا ابي اروح مستشفى فيه العاب وعرايس .
الأب : حاضر من عيوني .
البنت : وودي اسافر باريس ولندن .
الاب : اخس يالقويه ..مارحتي بعيد طالعه على امك .
البنت : بليز اوعدني بس لاتخلف بوعدك مثل ماسويت بماما .
الأب : ياللفضيحه …حتى بنتي تدري اني نكبه .
البنت : بابا ؟
الأب : عيونه
البنت : انا دايم اسمعك تشكي حالك لنفسك .
الأب : حتى سري عندك مفضوح ..طيب اوعدك اذا الله قدرني اسوي لك اللي تبينه .
البنت : ومابيك تزوجني لعيال اصدقائك .
الأب : حتى هذي سمعتيها ماشاء الله عليك .
البنت : ودي يابابا اجلس بحضنك والعب معاك انت وماما .
الأب : وانا ودي والله لكن عاد وش نسوي بنصبر .
البنت : بابا…… احس اني مارح اطلع .
الأب : ليه ياماما تقولين هالكلام .
البنت : مدري احساسي يقولي اني مارح اطلع .
الأب : احساسك هذا يبي يعور قلبي وبس ..بتطلعين باذن الله .
البنت : بابا قلبي يدق بسرعه انا خايفه .
الاب : اسم الله عليك لاتخافين بابا قلبك توه جديد قاعد يسخن .
الأم : احس بالم غريب تكفى خلنا نروح المستشفى .
وفي المستشفى
البنت : بابا ..ماما ..بشتاق لكم …بشتاق لكم .
الأب : لاتقولين هالكلام خلك قويه .
وتأتي الدكتوره
الأم للدكتوره : فيني الم غريب اول مره يجيني !!
الدكتوره بعد الفحص : ياساتر يارب لازم تنويم !!
الأب : يابنتي …..يابنتي ….يابنتي ؟!
ورحلت ابنته
قبل ان ترى الدنيا
قبل ان تعيش مع هموم والديها .
كان ابوها وامها ينتظران يوم ولادتها بشغف وسعادة
لكي تمسك اناملها بيده
حزن لفراقها كثيرا ومازال يصارع حزنه ويردد :
(( اللهم آجرني في مصيبتي وأخلف لي خيرا منها ))
ملاحظه : القصه خياليه والأب كان يختلق اجابات ابنته من صميم خياله
فهد احمد العبداللطيف
خبايا الروح
23 يناير, 2010 | 03:36لن ادع كلماتي تحكي بما اختزن صدري
لكن دموعي تتحدث بلغة الصمت =””)
أروى ،
24 يناير, 2010 | 14:42حزينة ..
تورق القلب دمعا وشكرا
حمدا لله ، فلولاه لما خضعت ثغورنا تبسما
ساعة الصدمة ..
احمده لأن دثر افئدتنا صبرا
وأسبغ في ارواحنا اثواب الرضا ،
نسق بديع ع ع
راق لي عمق الخيال في التحاور / بوح
لعل ماخطته مدامعي آنة الخبر قد داعب اجفانكم ، فقلبي ارتأى الصبر منكم واستيقظ :”) | انكسار
عظيم الشكر ()
راشد اليمني
29 يناير, 2010 | 12:21عزائي لأبو دانة
فعلا هذا حال وواقع كل من يعيش من أجل هدف يصبر نفسه ويعزيها لأنه يعلم أنه لا يستطيع تحقيقه
نظرة أوسع .. من أجل أهداف محققه
فهد العبداللطيف
1 فبراير, 2010 | 00:32خبايا الروح اروى
تأسفت لتفعيل حزن مشاعركم عن غير قصد ولكن ماذا افعل فهذا حكم الاصبع
اخوي راشي اليمني اشكرك على التعليق وفعلا من يعيش على الوهم قد تكون نهايته كحال ابودانه
تحياتي للجميع
اميره الورد
21 فبراير, 2010 | 07:57اخوي فهد تعجز الكلمات عن وصف الحزن بالقصه امنيتي ان لاتتكرر هاذه الماساه مع كل اب وكل ام في جميع العالم وأتممت لك المزيد من التقدم وروعه الكتابه المميزه والصادقه التي فعلا تنبع من قلبك مثل ماعوتنا ومشكووووور
المبسوطه
23 فبراير, 2010 | 16:50حزينه
بس روعه عشت معهم
نوودي
16 أغسطس, 2011 | 21:45مرررا حزينه القصه …
شكراا اخوي لقد امتعتنا بقدر ما احزنتنا …