وداعاً دانه
اضافة الموضوع بتاريخ 23 يناير 2010 الساعه 1:52 ص
دانه : ادري انك بابا وادري ان هذي ماما .
ابودانه : وانا ادري انك الغاليه….اقول ماودك تطلعين ؟
دانه : انا بصراحه خايفه اطلع واندم!!
ابودانه : ليه تندمين بالعكس مالك الا شي يرضيك ويبسطك بس تعالي .
دانه : انا مثلك يابابا احساسي مايخيب ..وانا احس اني بندم .
ابودانه : قلت لك مالك الا انك تعيشين عيشة اميرات وبشتري لك مملكة العاب وحلويات وادلعك واخليك من احسن البنات .
دانه : خابرتك كريم يابابا لكن كل هذي يبيلها فلوس وانت دايم تقول لماما ودي اعيشك اميره لكني فقير .
ابودانه : افااااا بدينا بالتجريح ..بس ماعليه على قلبي زي العسل .
دانه : بالعكس بابا راضيه والله بس لاتوعدني بشي منت قده تراني بنت بنشب بحلقك .
ابودانه : يابنت الحلال والله بدلعك حتى لو ابيع نفسي .
دانه : طيب انا مابي المستشفى الحكومي .لان امي تشتكي من خدمتهم .
ابودانه : مالك الا تروحين احسن مستشفى باذن الله .
دانه : طيب مممممممم شوف يابابا انا ابي اروح مستشفى فيه العاب وعرايس .
ابودانه : حاضر من عيوني .
دانه : وودي اسافر باريس ولندن .
ابودانه : اخس يالقويه ..مارحتي بعيد طالعه على امك .
دانه : بليز اوعدني بس لاتخلف بوعدك مثل ماسويت بماما .
ابودانه : ياللفضيحه …حتى دانه تدري اني نكبه .
دانه : بابا ؟
ابودانه : عيونه
دانه : انا دايم اسمعك تشكي حالك لنفسك .
ابودانه : حتى سري عندك مفضوح ..طيب اوعدك اذا الله قدرني اسوي لك اللي تبينه .
دانه : ومابيك تزوجني لعيال اصدقائك .
ابودانه : حتى هذي سمعتيها ماشاء الله عليك .
دانه : ودي يابابا اجلس بحضنك والعب معاك انت وماما .
ابودانه : وانا ودي والله لكن عاد وش نسوي بنصبر .
دانه : بابا…… احس اني مارح اطلع .
ابودانه : ليه ياماما تقولين هالكلام .
دانه : مدري احساسي يقولي اني مارح اطلع .
ابودانه : احساسك هذا يبي يعور قلبي وبس ..بتطلعين باذن الله .
دانه : بابا قلبي يدق بسرعه انا خايفه .
ابودانه : اسم الله عليك لاتخافين بابا قلبك توه جديد قاعد يسخن .
ام دانه : احس بالم غريب تكفى خلنا نروح المستشفى .
وفي المستشفى
دانه : بابا ..ماما ..بشتاق لكم …بشتاق لكم .
ابودانه : لاتقولين هالكلام خلك قويه .
وتأتي الدكتوره
ام دانه للدكتوره : فيني الم غريب اول مره يجيني !!
الدكتوره بعد الفحص : ياساتر يارب لازم تنويم !!
ابودانه : دانه …..دانه ….دانه ؟!
ورحلت دانه
قبل ان ترى الدنيا
قبل ان تعيش مع هموم والديها .
كان ابو دانه ينتظر يوم ولادتها بشغف وسعادة
لكي تمسك اناملها بيده
حزن لفراقها كثيرا ومازال يصارع حزنه ويردد :
(( اللهم آجرني في مصيبتي وأخلف لي خيرا منها ))
ملاحظه : القصه خياليه وابودانه كان يختلق اجابات دانه من صميم خياله
فهد احمد العبداللطيف
خبايا الروح
23 يناير, 2010 | 03:36لن ادع كلماتي تحكي بما اختزن صدري
لكن دموعي تتحدث بلغة الصمت =””)
أروى ،
24 يناير, 2010 | 14:42حزينة ..
تورق القلب دمعا وشكرا
حمدا لله ، فلولاه لما خضعت ثغورنا تبسما
ساعة الصدمة ..
احمده لأن دثر افئدتنا صبرا
وأسبغ في ارواحنا اثواب الرضا ،
نسق بديع ع ع
راق لي عمق الخيال في التحاور / بوح
لعل ماخطته مدامعي آنة الخبر قد داعب اجفانكم ، فقلبي ارتأى الصبر منكم واستيقظ :”) | انكسار
عظيم الشكر ()
راشد اليمني
29 يناير, 2010 | 12:21عزائي لأبو دانة
فعلا هذا حال وواقع كل من يعيش من أجل هدف يصبر نفسه ويعزيها لأنه يعلم أنه لا يستطيع تحقيقه
نظرة أوسع .. من أجل أهداف محققه
فهد العبداللطيف
1 فبراير, 2010 | 00:32خبايا الروح اروى
تأسفت لتفعيل حزن مشاعركم عن غير قصد ولكن ماذا افعل فهذا حكم الاصبع
اخوي راشي اليمني اشكرك على التعليق وفعلا من يعيش على الوهم قد تكون نهايته كحال ابودانه
تحياتي للجميع
اميره الورد
21 فبراير, 2010 | 07:57اخوي فهد تعجز الكلمات عن وصف الحزن بالقصه امنيتي ان لاتتكرر هاذه الماساه مع كل اب وكل ام في جميع العالم وأتممت لك المزيد من التقدم وروعه الكتابه المميزه والصادقه التي فعلا تنبع من قلبك مثل ماعوتنا ومشكووووور
المبسوطه
23 فبراير, 2010 | 16:50حزينه
بس روعه عشت معهم
نوودي
16 أغسطس, 2011 | 21:45مرررا حزينه القصه …
شكراا اخوي لقد امتعتنا بقدر ما احزنتنا …