تتبع اخر القصص
جارى التحميل...Loading...

رسالة التأكيد سوف ترسل إليك. تسجيل دخول | حساب جديد

قصة : عكس عكاس

اضافة الموضوع بتاريخ 23 نوفمبر 2009 الساعه 5:57 م
قصة : عكس عكاس

استثناء : شكر خاص جدا لفضيلة الشيخ الدكتور/ محمد بن عبدالرحمن العريفي حفظه الله ورعاه

قصة : عكس عكاس - الجزء الثاني

لقبوله دعوتي للمشاركه في كتابة حواره الذي ستقرأونه في سياق القصه علماً باني أرسلت لأكثر من شيخ معروف بنفس الوقت ولم تردني اجابه سوى من فضيلته فقط (التمس العذر لهم طبعا) .

الشيخ محمد العريفي بتواضعه المعروف عنه الوحيد الذي تجاوب معي رغم انه لايعرفني وماذكر باسمه في الحوار ادناه بخط كيبورده شخصيا دون أي اضافه مني .

اسال الله أن يثيبه ويجزيه خير الجزاء ويكثر من امثاله .

قصة:عكس عكاس

ام وليد على الهاتف:

هلا والله بالغالي ….وش اخبارك ؟

وليد :

هلا يمه انا بخير..وش اخباركم واخبار الديره ؟

ام وليد :

بخير الحمد لله مشتاقين لك بس انت الله يهديك معذبنا ومعذب نفسك

ليتك مااخذت صيفي وجيت لديرتك تغير جو .

وليد :

اما اغير جو بالرياض!!!…انا ابي اخلص من الدارسة بوقت قصير عشان ارتاح .

ام وليد :

عسى ماغروك الحمر والشقر بس ؟ احفظ نفسك ترى ماوراهم الا المصايب .

وليد :

ولييييه …….شكلك من كثر ماتوصيني بخربها مع هالحمر والشقر

لاتوصين حريص يمه…. اصلا انا مايملي عيني الا البنت السعوديه .

ام وليد :

تعجبني .

وليد :

وش أخبار اعمامي وخوالي وحريمهم وعيالهم؟

ام وليد :

كلهم بخير ويسالون عنك ..نوره بنت خالتك تقول ورا وليد مايشارك بقروب بونواف مثل اول.

وليد :

هههههههه ياخي المعجبات مشكله… قولي لها بطلنا خلاص …في عضو بالقروب ماكل الاخضر واليابس مو مخلي لنا فرصه ننافسه .

ام وليد :

من هذا وليش مو مخلي لك فرصه ؟

وليد :

هذا عضو رااايق ودمه خفيف اسمه ورقة بلوت ايميلاته مثل ايميلاتي لكن عجزت اجاريه واعتزلت….والمبتعثين من السعوديه والخليج والعرب المشتركين بقروب ابونواف من يجي طاري القروب هو اول واحد يذكرون اسمه .

ام وليد :

وليش ماتخلي قوة هالعضو هدف توصله وتتعداه… لاتيأس وحاول تشارك طلع مواهبك المدفونه ولاتقول مافي مواهب ماحد خالي من الموهبه لكن الذكي هو اللي يعرف يطلعها..وحتى لو مواضيعك ماتعجب الاعضاء بيجيهم يوم ويعجبهم ان شاء الله.

وليد :

أصلا بونواف مايقبل الا الايميلات المميزة ومجرد نشر الايميل بالقروب شهاده ان الموضوع مميز واكيد بيعجب الاعضاء.

ام وليد :

اجل شارك من اليوم خلني اشوف طموحك وين يوصلك..المهم خلاص طولت عليك انتبه لنفسك وحافظ على الصلاة والاذكار عشان الله يوفقك ويحميك.

وليد :

ابشري يمه وسلمي على الجميع تكفين .

بعد مرور أسبوع

ام وليد :

والله اني خايفه لو شافنا وليد تجيه سكته من المفاجأه .

ابووليد :

تسمعين بالسكته انتي؟؟ ….لاتخافين ان شاء الله مايجيه شي بالعكس فرحته بتكون كبيره .

ام وليد :

طيب على الاقل المح له عشان لو شافني قدامه مايغمى عليه .

ابووليد :

يابنت الحلال خليها مفاجأه عشان ينبسط اكثرقوي قلبك مايجيه شي ان شاء الله .

ام وليد :

ليتك جاي معنا عشان تحلى السفره .

ابووليد :

ماني بمجنون اعلق نفسي بالجو 14 ساعه .

في المساء تتجه ام وليد وأبنائها الى مطار الملك خالد وأثناء الانتظار كان يجلس في الجهة المقابلة لهم شخصين :

خالد:

شف بس المصخره مسافره مع بزارين لحالها لامحرم ولارجل يسترها .

ناصر :

وش دراك انها رايحه لحالها يمكن زوجها جاي بالطريق.

خالد :

من دخلت المطار وهي لحالها انا مراقبها وبعدين اذا شفت الوحده كاشفه الوجه اعرف ان ماعندها رجال .

ناصر :

خل الحرمه في حالها تراها متسترة ومتحجبة .

خالد :

البلى في الحجاب لان الوجه باين وهي حلوه وهذي فتنه .

ناصر :

تطالع فيها وتقول فتنه!! ..غض بصرك وريح نفسك.

خالد :

والله ماخليها…… اصبر بوريك وش بسوي .

ناصر :

تعال يالخبل وين رايح ؟!

خالد :

مساء الخير ؟

ام وليد :

مساء النور .

خالد :

وراك ماتغطين وجهك ياخاله ؟

ام وليد :

خاله بعينك ..شايفني كبر امك ..بعدين وش دخلك انت اغطي وجهي والا اكشفه .

خالد :

لاتدفين طيب انا تهمني مصلحتك … خافي ربك وتستري ؟

ام وليد :

وانت ماتخاف ربك يوم تدخن بمكان عام……تضر نفسك وتضر خلق الله؟

خالد :

اقول تستري بس .

ام وليد :

شكلك صايع وتبي تلعب روح احسن لك والا ناديت امن المطار .

خالد بخبث :

طيب ماتبين خوي بالسفره ؟

ام وليد(تنهض من مكانها) :

وش تقصد يابن ال.. طوط طوط .

خالد يتراجع للخلف :

معليه بيجيك يوم وتندمين على فعايلك .

ام وليد :

انقلع قلعك الله .

حسام ابنها :

امي دقي على خالي بندر والله لو يجي يسوي وجهه زحليقه.

ام وليد :

مايحتاج انا أدبته .

بعد عودة خالد الى مكانه :

ناصر :

تستاهل خل اللقافه تنفعك…الناس كلها شافتك .

خالد :

لعادي بس علمتها ان الحرمه تتمصخر بدون رجال .

ناصر :

حرام عليك والله اني رحمتها مسكينه يمكن مطلقه يمكن ارمله ياخي خاف ربك لاتسيء الظن .

خالد :

حتى لو هي مطلقه او ارمله وين ابوها وين اخوها وين عمها وين خاله ؟

ناصر :

لايكون انت مسئول عن الناس وانا مدري؟ لاتسوي فيها ملتزم وانت دب داشر .

خالد :

ياخي بس الملتزم اللي ينصح ….انا قصدي انها سعوديه يعني تعتبر من محارمي .

ناصر :

منت بصاحي!!! شلون من محارمك وهي ماتقرب لك وبعدين الملتزم ماهو بملقوف زيك واذا نصح ينصح عن درايه موب زيك جاهل وتتفلسف .

خالد :

وش عنده الجامعي…اقول اقطع واخص بس الشرهه علي اللي مسافر معك .

ناصر :

انا باسالك سؤال ……..خواتك الحين وينهم فيه ؟

خالد :

اكيد بالبيت!! .

ناصر :

طيب وش رايك ان خواتك الحين في حفله خاصه مع شباب .

خالد بنرفزه:

كل تراب واحترم نفسك .

ناصر :

دق عليهم وبتتأكد من كلامي .

يتصل خالد على شقيقته نوف ويسمع صوت الاغاني:

خالد بعصبيه :

نوووووف وش ذا الموسيقى انتي في وين؟؟….. اقسم بالله بذبحك ؟!!

نوف :

هلا خالد عندي ازعاج مااسمعك زين؟

خالد يصرخ :

الو الو …….اف قفلت الخط ..ذابحها ذابحها خلاص ماني مسافر .

ناصر :

هههههههههههههههههههههه يامخفه يادلخ ياغبي ..نسيت ان اليوم زواج ماجد ولد خالتك وخواتك بصالة الزواج الحين .

خالد :

يوووووووووه ياخي حرام عليك نشفت دمي .

ناصر :

عشان اعلمك ان سوء الظن مرض فيك .

خالد :

بس تعال شلون بعرس وداخله بالجوال ؟؟!!

ناصر :

ماتتوب انت ؟؟ بالعرس بالعرس لاتوسوس يمكن جوالها مافيه كاميرا .

بعد فتره تصعد ام وليد وابنائها الطائره وبعد الجلوس بمقاعدهم:

المضيف :

لو سمحتي اختي في كرسي بالخلف جالسه فيه بنت وجنبها الاخ اللي واقف هناك وهي رافضه يجلس جنبها .

ام وليد :

وتبيني اقنعها أنها توافق مثلا ؟؟!

المضيف :

اذا ماعليك تكليف تجلسين جنبها والرجال يجلس جنب ولدك .

ام وليد :

وش يوديني بآخر الطياره ازعاج وصوت المحركات وبعدين عيالي وراي هنا اسفه اسمح لي .

المضيف :

بتسوين خير بالرجال لانه بيوقف على رجله طول الرحله .

ام وليد :

ماشاء الله عليه سمين وراه ماحجز درجه اولى اوسع له؟ يمكن البنت رفضت عشان مايضايقها بالجلسة ومعذورة بصراحة .

المضيف مبتسماً :

ماندري عن ظروفه اختي.

ام وليد :

اسفه كان ودي اساعده لكن مستحيل اجلس ورى واترك عيالي هنا…بعدين اسمعنى انا ليه ماتشوف باقي المسافرين ؟

المضيف : انتي المسافره العاشره اللي اطلب منها وكلهم رافضين والبقية كلهم شباب او رجال عموما مشكوره وماقصرتي .

بعد 14 ساعه تهبط الطائره في مدينة نيويورك وكانت لديهم رحله اخرى في اليوم التالي الى سياتل حيث تقع جامعة وليد وقبل خروجهم من المطار :

حسام :امي امي شوفي ذاك الولد ابو تي شيرت احمر يشبه اخوي وليد .

ام وليد :

وينه ……….والله يعقب..لو هذا ولدي تبريت منه
هذا شكله اجنبي ووليد رجال مايحلق شنبه ويعلق سلسله بصدره
ان شاء الله وليد بيرجع من امريكا مربي اللحيه وملتزم مثل خاله بندر .

حسام :

هذا مسوي شعره سبايكي …..انا بسويها هنا .

ام وليد :

لو سويتها لا انت ولدي ولا اعرفك.

ندى ابنته:

امي… متى بنقابل وليد ؟

ام وليد :

الليله بننام في هالديره وبكره رحلتنا للديره اللي فيها وليد .

ندى :

وليه مانروح له اليوم ؟؟

ام وليد :

ودي اسكن بهالديره عن خاطري وبكره نروح لوليد ماورانا شي .

حسام :

نبي نسوي المفاجأه لوليد فلم رعب انتو تتخبون جنب الباب وانا أدق الجرس بعدين لما يفتح اناظر فيه بعدين اركض عشان يفكرني شبح وتجين انتي وتصرخين باذنه عشان ينقز … هع هع .

ام وليد :

لا ياحسام هذا ذبح علني موب مفاجأه..حنا نتصل عليه نسولف وبعدين ندق الجرس ويفتح وانا على الخط عشان المفاجأه تصير خفيفة .

واثناء بحث ام وليد عنباب الخروج لركوب التاكسي:

ام وليد لعامل بالمطار : سكوزمي … لموزين…… وير؟

عامل المطار :

وات؟

ام وليد :

لموزين… كار.. هوتيل ؟

عامل المطار باشمئزاز:

قو تو انفورميشن اوفيس اند اسك ذيم .

ام وليد :

الله يخزيه شافني متحجبة ويفكرني اسال عن البرتشن!!!
نو برتشن……تكسي تكسي .

عامل المطار :

اووووه تااااااااكسي ..اوكي يو كان قيت ون فرم آوت سايد أور قو تو تاكسي اوفيس اندقيت ون .

ام وليد :

والله ورطه…… مدري وش يقول!!

حسام :

يمكن يقوله انه هو راعي التكسي .

ام وليد :

لأ هذا عامل نظافه هذا خلك ساكت بس .

واثناء حيرة ام وليد يأتي الرجل الذي رفضت التبديل معه بالطائره :

الرجل :

محتاجه مساعده اختي ؟

ام وليد :

ابي تكسي اخوي وهالفاهي شكله مايعرف انقليزي .

الرجل :

  ههههه تعالو معي بوصلكم لمكان التكاسي.

ام وليد :

معليش اسمح لي مافزعت معك بالطيارة لكن كانت فيني دوخه وماقدرت اتحرك والمضيف الله يهديه ماعطاني فرصه اعلمه وراح .

الرجل :

هههههههههههههههههه شدعوه عادي من حقك …..بالعكس جت من صالحي جلست بالمطبخ مع المضيفات اكل وشرب وسوالف ههههههههههههههههههههههههههه.

ام وليد :

باين انك كثرت من اكل الفطر .

الرجل باستغراب :

أي فطر ؟؟!!

ام وليد :

مدري اشوفك تضحك كثير .

الرجل :

احم …تفضلي من هنا اختي .

بعد ان اوصلهم لمكتب حجز التاكسي شكرته ورحل :

حسام :

كانت فيك دوخه اجل هاااه ..تكذبين ياامي !!!

ام وليد (بخجل) :

ماكذبت هذي مجامله عشان اجبر بخاطره وهذي للكبار بس الصغار مايسوونها انتبه تقلدني .

في اليوم التالي تستقل ام وليد وابنائها الطائرة الى مدينة سياتل وبعد خمس ساعات يصلون ويستقلون تاكسي الى مقر سكن الجامعة وقبل وصولهم للسكن تتصل باابو وليد :

ام وليد :

ورا جوالك مقفل تعبت وان اتصل .

ابو وليد :

هلا ام وليد…… جوالي طفى من البطاريه وانا نمت بالاستراحه وتوني شاحنه بالسياره….هذا رقمك الجديد؟

ام وليد :

ايه امس ركبت الشريحه الجديده . اقول كيف البيت بدوني ؟

ابو وليد :

مانمت فيه اقولك وجاي البيت ابدل ثيابي وبطلع معزوم على العشى .

ام وليد :

وليش ماتنام بالبيت ؟ خايف ههههههه؟

ابو وليد :

بيت وش كبره ولحالي فيه اكيد باستاحش ومارح يجيني نوم .

ام وليد :

تستاهل ماحد قالك تجلس لحالك .

ابو وليد :

افاااا ….تصدقين نسيت اقفل باب المدخل .

ام وليد :

الله يهديك بس انتبه لايسرقون صندوق الذهب؟

ابووليد:

بس هذا اللي همك؟ اقول وصلتو لوليد؟

ام وليد :

يقول التكسي خمس دقايق ونوصل سكن الجامعه …..والله قلبي يخوفق خايفه عليه من التخرع .

ابو وليد :

عسى مشيتي امورك باللغه؟

ام وليد :

الحمدلله اكتشفت اني فطحله باللغه ومشيت اموري… واخوي بندر ماقصر كتب لي العناوين بورقه عشان مانضيع والحمدلله تساهيل .

ابو وليد يصرخ :

بسم الله الرحمن الرحيم قل اعوذ برب الفلق…. بسم الله الرحمن الرح…. ( انقطع الخط ) .

ام وليد :

وش فيك …الو الو محمد وش فيك ..الوو .يارب سترك يارب سترك مدري وش فيه ابوكم ؟

ام وليد تعاود الاتصال :

ياربي جواله مسكر الظاهر انه شاف جني وجته سكته… الله يستر الله يستر .

يصل التاكسي الى مقر سكن الجامعه وتنزل ام وليد مسرعه وتسال عن غرفة وليد ثم تتجه لها وتدق الباب وهي تصرخ: وليد الحقنا ابوك ابوك .

بدر يفتح الباب :

سلامات سلامات وش السالفه ؟

ام وليد :

هذي غرفة وليد محمد ؟

بدر :

ايه غرفته لكن ماهو بموجود .

ام وليد :

ياربي وين رايح؟؟ ……… انا امه .

بدر :

امه!!!!!!! وليد اتوقع انه الحين في بيتكم بالرياض .

ام وليد :

وشووووووووووووو!!! (بلقت عيونها) تكفى لاتقول انه كان لابس تي شيرت احمر ؟!!!

حسام :

اجل بيرجع ملتزم مثل خاله بندرههههاااي .

ام وليد لحسام :

ورى ماتسكت انت .

بدر :

تفضلو ياخاله حياكم الله انا بدر خوي وليد بالغرفه .

ام وليد :

الله يهديك ياوليد هذا وقت مفاجآت… خليتنا نخسر كل هالخساير .

بدر :

ماعليه ياخاله هونيها وتهون انا وهو واحد ..انتو كم يوم جالسين هنا ؟

ام وليد :

لاتقول ياخاله الله يخليك نادني ام وليد .

بدر :

اسف!! .

ام وليد :

الحين عرفت ليش ابووليد خاف اكيد دخل البيت وشاف وليد… الله يستر لايكون جته سكته من الخرعه .

بدر :

هو كان يبي يسوي لكم مفاجأه……انتو كم يوم جالسين هنا ؟

ام وليد :

جواله وجوال ابوه مسكرين ياناس انا خايفه على زوجي ..بتصل على اخوي بندر .

ام وليد على الهاتف :

السلام عليكم …. .بندر ان نوره اكلمك من رقمي الجديد .

بندر :

هل بالمتأمركه والعياذ بالله حمد الله على السلامه وراك ماعلمتينا بالرقم الله يهديك خليتينا نحاتيكم .

ام وليد :

بندر تكفى انا حالتي حاله روح بيتنا شوف ابو وليد كان يكلمني وشاف وليد وتخرع وخايفه يكون صار له شي .

بندر :

أي وليد اللي شافه!!!! انتي وينك فيه الحين ؟

ام وليد :

انا بسياتل وليتني ماجيتها ..لان وليد طلع مسوي لنا مفاجأه وراح الرياض .

بندر :

افااااااااااااااااااااا.. سوى لك عكس عكاس الدلخ..حركته مالها داعي بضربه ضرب ان شفته .

ام وليد :

وش دخلك انت تضربه!! وبعدين اذا هو دلخ انا ادلخ منه لاني سويت مثله..الحين انا ابي اعرف وش صار على ابوعيالي .

بندر :

هذاني ركبت السياره دقيقه وانا واصل بيتكم وبتصل عليك ..اجل صرتي من شعب الرفاهيه ههههههههههه .

ام وليد :

والله انك رايق …روح بسرعه وطمني انا جالسه انتظر ..مع السلامه

بدر :

انتو جايين تتمشون بسياتل و.. ؟

ام وليد :

لا جاين نبيع فقع .

بدر :

فقع!!!

ام وليد :

مدري عنك …. اكيد جايه اتمشى واشوف ولدي .

بدر :

انا اقصد لو كان وليد هنا هل بتجلسون في سياتل و…

ام وليد :

عندك مويا ؟

بدر :

اووه سوري دقيقه اجيب العصير.

ام وليد :

مويا مويا ماأبي عصير.

يأتي اتصال من جوال شقيقها بندر :

ام وليد :

بشرني بخير الله يخليك .

ابو وليد :

هلا ام وليد .

ام وليد :

هلا بحبيب قلبي الحمدلله انك بخير..شفت وش صار لنا ؟

ابو وليد :

قالي بندر لكن وليد ماجاني وجواله مسكر ؟

ام وليد :

وشووووو ..اجل وراك قمت تصارخ وتتعوذ وطفيت جوالك ؟

ابو وليد :

لو شفتي اللي طلع لي والله انك تختمين القران من الخرعه .

ام وليد :

يعني اللي طلع لك موب وليد ؟

ابو وليد :

يوم دخلت البيت كان اظلم وشفت لي قطو اعوذ بالله اسود وعيونه تقول زينون ويوم شافني جاني يركض يبي يطلع برى وانا تخرعت وقمت اركض ورميت الجوال وتفكك .

ام وليد :

قلت السالفه لاحد ؟!!

ابووليد :

بس بندر ومن قلت له وهو ميت ضحك .

ام وليد :

بلى من الفضيحه يضحك..يابوليد لاتقول السالفه لاحد والله فضيحه رجال بكبرك ويسوي اللي سواه .

ابووليد :

ايه رجال ولكن هالمواقف مافيها رجوله فيها حطت رجل لاني قلت يمكن انه متلبس بسم الله الرحمن الرحيم والبيت اظلم يعني قدري الوضع !!

ام وليد :

خلنا من هذا الحين وشوف لي وليد ابي اتطمن عليه .

ابووليد :

المشكله جواله مسكر!!

ام وليد :

مصيبه الحين تطمنت عليك ورجعت اقلق عليه الله يستر
انا برسل له رساله من رقمي الجديد اعلمه اني بامريكا عشان اول مايفتح الجوال يدق…..حنا الحين بسكن الجامعه وبنطلع للفندق .

ابووليد :

الله معاكم واذا دق علي وليد علمتك ..مع السلامه .

ام وليد :

 معليش يابدر قبل شوي ماكنت بوعيي لايكون غلطت عليك ترى اسويها .

بدر :

لا ياخاله بالعكس على قلبي زي العسل .

ام وليد بنرفزه:

يوم اقولك لاتقول ياخاله كنت بوعيي يعني لاتقولها الله يخليك. المهم لازم نطلع نسيت نفسي مايجوز اجلس هنا وانت غريب عني.. اللي صار ينسي الواحد اسمه .

بدر :

انا اعتبرك مثل امي قسم بالله .

ام وليد :

 ايش !!!!

بدر بارتباك :

 اممختي .

ام وليد :

وشو !!؟؟

بدر :

 اختي الصغيره والله

ام وليد :

هههههههه كم عمرك انت؟

بدر : 21

ام وليد :

ماشاء الله بس جسمك مايدل على عمرك .

بدر :

 لا 21 قسم بالله ..كم مدة سفرتكم ياام وليد؟

ام وليد :

ليه ماتستغل وجودك بامريكا وتخفف اكل وتتمرن .

بدر : المشكله هنا الشباب بالسكن مايعطونا فرصه يسوون كبسات وحنا من الشفقه ناكل كبسه ثلاث مرات باليوم نطلع من شقه وندخل شقه كأنها لجنة تحكيم احسن طبق .

ام وليد : ماعليكم لوم لكن برضو لازم تخفف عشان صحتك .

بدر :

ان شاء الله بحاول … انتو كم ليله جالسين هنا؟

ام وليد :

انا مايذبحني الا بحاول هذي كل ماقول لواحد شي يقول بحاول…ابيك تشيلها من عقلك وبدل ماتقول بحاول تعزم على طول وانت الربحان بالاخير. المهم حنا بنمشي للفندق الحين عيالي نامو من التعب مساكين…. مشكور وماقصرت يابدر واسمح لي اذا قسيت عليك والا شي .

بدر :

بالعكس ماجاني منك الا كل خير ..انا بوصلكم للفندق بسيارة خويي
وكل يوم بجيكم امشيكم واذا تبون اجيكم اليوم بالمساء تامرين امر بس ماقلتي لي كم مدة رحلتكم ؟

ام وليد :

ماشاء الله عليك الله يحفظك لامك ونعم الولد خاصه اني كنت معتمده على وليد لكن انت الحين مكانه ودام عمرك 21 تقدر تناديني ياخاله ههههههه… بس مانبي نطلع اليوم بنجلس بالفندق انا شايله هم وليد .

حسام :

جايين عشان نجلس بالفندق؟ ..انا مابي اجلس مالي دخل .

ام وليد :

يازينك نايم..وشلون تروح تتمشى واخوك ماندري وينه؟

حسام :

يعني نحبس روحنا حتى بالسفر.

ام وليد :

خلاص خلاص فكنا بنوديك نمشيك.

تخرج ام وليد وابنائها من سكن الجامعه وتتجه الى الفندق وفي الطريق :

حسام :

شفتي شلون وليد مسوي سبايكي ومعلق قلاده مثل الكفار..انا بسوي مثله.

ام وليد :

سوه وشوف وش يجيك.

حسام :

اشمعنى وليد طيب ؟

ام وليد :

وليد بتفاهم معاه اذا شفته .

حسام :

خلاص انا بسويها وتفاهمي معنا مره وحده .

ام وليد :

ايه ذكرتني بدق على خالك يلغي حجزنا لولاية اورلاندو خلاص ماله داعي نروح ديزني لاند ….عندن ملاهي الحكير احلى منها بكثير.

حسام :

عادي مانبي نروح لهذي الولايه بس نبي ديزني لاند .

ام وليد :

مادريت؟؟ مو ديزني لاند ركبوها في اورلاندو .

حسام (يحك راسه) :

 هاه ….اصلا انا ماني بمجنون عشان اقلد الكفار .

ام وليد :

ايييوه هذا ولدي اللي اعرفه .

وفي الطريق يشاهدون تجمع لمظاهره امام احدى المباني :

ام وليد :

عاد جينا لديرة المظاهرات وش يطالبون فيه بعد؟

بدر :

لو اقولك بتنصدمين …مسوين مظاهره عشان مسلسل!! .

ام وليد :

كيف يعني ؟

بدر :

مسلسل امريكي مسوين له اربع مواسم وذولي يبونهم يسوون موسم خامس غصب .

ام وليد :

ياحليلنا حنا مدلعين اجل ..طاش ماطاش سووه 16 موسم بدون مانسوي مظاهرات !!

بدر :

خخخخخخخخ حلوووه……….الفندق الموجود بالحجز فخم ورايق وقريب من كل شي .

ام وليد :

هذا حجز بندر اخوي ماشاء الله عليه .

بدر :

كم ليله بتجلسون هنا؟

ام وليد :

البكج 20 يوم جوله في كم ولايه وفي سياتل خمس ايام .

بدر :

اخيراً (يرقص حواجبه) .

ام وليد :

وشو اللي اخيراً .

بدر :

احم ….اخيرا وصلنا يعني .

ام وليد :

وينه الفندق ؟

بدر :

قدام شوي .

تصل ام وليد الفندق ويكمل لهم بدر اجراءات الدخول واثناء وجودهم بالغرفه يأتي اتصال على جوال ام وليد :

ام وليد :

هذا وليد وليد …الو الو ؟

وليد :

هلا يمه…….. انتي من جدك بامريكا؟

ام وليد :

الحمدلله انك بخير ..ايه انا بسياتل ….ابي اعرف وش هالمفاجأت الماصخه اللي تسويها.بعدين معقوله توك واصل الرياض من اول امس ؟

وليد :

انا بامريكا مارحت الرياض لانهم وقفوني بالمطار اشتباه بالاسم وطلعت اليوم عن طريق السفاره ..واول ماشفت رسالتك انهلعت من المفاجأه .

ام وليد :

ليش مشتبهين فيك ؟!!

وليد :

تذكرين سالفة الطالب اللي قلت لك عنه قبل فتره انجن وصار يهددنا انه بيقول لل اف بي آي ان حنا ارهابييين ؟

ام وليد :

ايه وش فيه ؟

وليد :

سحبوه قبل كم يوم من كثر مايتكلم قدام العالم وماخلى اسم ماقاله يتبلى وانا كنت من ضمنهم ..ويوم شافوني بسافر مسكوني تحقيقات وبعدين سمحو لي ادق على السفاره ويوم دقيت قالو بكره نرسل لك المحامي يشوف وضعك . .

ام وليد :

وش هالمصخره ليش السفاره يخلونك الى ثاني يوم .

وليد :

قالو ان المحامي بيجي من واشنطن بالطياره……. طيب كلموهم تلفون بدل ماتجون..قالو لا ذولي مايتفاهمون الا وجهاً لوجه .وجاني اليوم ووضح لهم كل شي وطلعت قبل شوي ولا كأن صار لي شي الحمدلله .

ام وليد :

اجل بهدلوك حسبي الله عليهم ..طيب لاتروح الرياض ارجع سياتل؟

وليد :

ايه الحين بحجز على سياتل بكره الصبح ….. بس والله احلى مفاجأه يايمه غلبتيني هالمره .

ام وليد :

تعلم من امك وانا امك ههههههههه…يالله روح احجز يمكن تلاقي رحله الحين وتجينا على طول وكلمني علمني وش يصير معك .

وليد :

مافي امل الاقي غير بكره الصبح..عموما اول مااحجز بعلمك….بدق على بدر اوصيه عليكم .

ام وليد : بدر ماقصر وبيجينا اليوم يمشينا مايحتاج توصيه .

وليد :

ايه خابره نشمي …خلاص يمه بروح احجز فمان الله .

ام وليد لحسام :

بسك نوم قم صل المغرب اخوك وليد ماراح الرياض وبيجينا بكره .

حسام بتعب :

حلو حلو …بس بصلي اذا قمت .

ام وليد :

قم صل وارجع نام …..بكيفك بنطلع نتمشى ونخليك .

حسام يفتح عين وحده :

كم يأذن عندهم طيب ؟

ام وليد :

ثمان ونص .

حسام :

يالله تو الساعه سبع ونص حرام عليك خليني انام .

ام وليد :

 ساعتك اللي بيدك بتوقيت السعوديه يافتى النوم والحين سبع ونص الصبح بالسعوديه عشان تفرح بس .

حسام :

حنا بسفر عادي لو نأخرها .

ام وليد :

مافي تأخير صل الصلاه بوقتها عشان الله يحفظك بالسفر .

حسام :

بصلي بس توديني ستار بكس مو تقولين لي مقاطعه عادي في السفر نسوي اللي نبي .

ام وليد :

لو قاطعناهم بنموت جوع …. حنا بديرتهم يااهبل . الله يسامحنا بس مضطرين ومع هذا بوديك ستار بكس مره وحده عن خاطرك وبعدين بنخلي بدر ووليد يودونا مطاعم عربيه اذا كان فيه .

حسام :

شلون بسهر اليوم وانا ماشبعت نوم ؟

ام وليد :

نايم من العصر مايكفيك ؟ ….. طبعا ماقلت اذكار المساء

حسام :

ايش ايش ؟؟ حتى الاذكار نقولها بالسفر..لاتخافين الامريكان ماينظلون .

ام وليد :

منت بصاحي …الاذكار بتحفظك من كل شي باذن الله مو من العين بس ….ماتخاف وانت ماشي يدوسك امريكي سكران والا تطيح في بالوعه مليانه فيران تاكل وجهك ؟

حسام بعصبيه :

قسم بالله احس اني بالرياض .

ثم يأتي بدر ليأخذهم بجوله في المدينه :

بدر :

حمد لله على سلامة وليد ياخاله؟

ام وليد :

الله يسلمك يابدر…..الحمدلله الحين نقدر نتمشى على راحتنا .

حسام :

بدر… نبي نروح ستار بكس .

بدر :

ابشرو بوديكم اول مقهى لستار بكس فتح في العالم وبوديكم مصنع ستار بكس بعد .

ام وليد :

امركم غريب يالشباب تحفظون اللي ماله سنع ولو اسالك اذا حافظ شي من القران بتقول لا .

بدر :

شدعوه معلومة عاديه هذي ….عموما انا حافظ جزء عم الحمدلله والله يرزقني حفظ القران ……..الظاهر ماتبين معلومات عن المدينه هههههه ؟

ام وليد :

لا والله انا ابي اتمشى واشوف طبيعه .

وبعد نزولهم من السياره واتجاههم الى ستار بكس :

شحات امريكي يقول لام وليد : سكارت سكارت ليدي .

بدر :

ماعليكم منه واصلو مشي .

ام وليد :

يطلب مني انا زقاير هالعفن .

الشحات وهو يلاحقهم : ماي موذر ديد ان ناين إليفين, بت ذات دزنت نيسيساريلي ميين ذات آي هايت أرابز, بيكوز ديب ديب داون آيام شور ذات ماي غوفرنمنت كوسيد ايت .

بدر : لاتوقفين ياخاله ترى هذا مجنون ؟

ام وليد : لحظه خلني ارد عليه ….فرند مي سيم سيم يور بيبي نو سي ماي مذر بليز ..قال ايش قال ياامي وانا كبر بنته هلي مايستحي ….. بعدين وش باقي كلامه انا مافهمت الا ياامي .

بدر يضحك بصوت عالي : خخخخخخخخخخخخخخخخخخخخخخخخخخ
آآآه يابطني خخخخخخخخخخخخخخخ .

ام وليد :

بطنك !!!! يمكن ضحكتك فيها سم هههههههههه…وش يقول هالامريكي شكله سبنا .

بدر :

آآآه ياخاله الله يوسع صدرك ليت وليد طالع عليك كان ماحسيت بالغربه. الامريكي يقول ان امه ماتت في تفجيرات 11/9 بس هو مايكره العرب لأنه متأكد ان حكومتهم تسببت في هالشي .

ام وليد :

ياحرام رحمته الضعيف ..طيب قله دامه يحب العرب ليه مايعتنق الاسلام ابرك له .

بدر :

لأ…مانقدر نقوله لانه لو اشتكى نروح بداهيه .

ام وليد :

والله ودنا له بالهدايه شكله طيب وحبوب ….وش جالس يشرب لايكون خمر؟

بدر :

ايه خمر .

ام وليد :

عشان كذا يحب العرب لكن لو صاحى بيسب فيهم سب..خله يولي اجل .

وقبل دخولهم المقهى :

حسام : امي امي شوفي اللي طالع من المجمع كأنه الشيخ محمد العريفي؟

ام وليد :

وينه؟؟…..اي والله هذا هو ماشاء الله… وش يسوي بامريكا ؟

بدر :

الشيخ محمد دايم يسوي محاضرات دعويه داخل وخارج السعوديه .

ام وليد :

تتوقع لو سألناه واستفتيناه بيردنا ؟

بدر :

الا بيرحب فيكم ومعروف عنه هالشي ……دقيقه بروح اسأله .

يتجه بدر الى الشيخ محمد العريفي :

بدر :

السلام عليكم مساك الله بالخير ياشيخ محمد .

الشيخ محمد العريفي :

 وعليكم السلام مرحبا ولدي .

بدر :

ياشيخ الخاله ام وليد ودها تستفتيك في بعض الامور اذا ماعندك مانع .

الشيخ محمد العريفي :

لا بالعكس قلها تسال وتاخذ راحتها واذ كانت تخجل تقدر تكتب لي الاسئله بورقه وانا سأجيب عليها باذن الله .

يعود بدر الى ام وليد ويخبرها فتفضل مواجهة الشيخ وتذهب له :

ام وليد :

المعذره ياشيخ اشغلناك لكن ودي استفتيك في بعض الامور .

الشيخ محمد العريفي :

تفضلي يااختي .

ام وليد :

انا البس الحجاب في ديرتي وفي السفر بنفس الطريقه ونظرة الناس لي تحسسني كأني عامله جريمه رغم اني مااحط المكياج وعباتي فضفاضه داخل وخارج البلد وودي انك تعلمني اذا اللي اسويه محرم والا لا وهل يجوز اني مالبس العباه خارج السعوديه عشان مااتعرض لمضايقات من الاجانب ؟

الشيخ محمد العريفي :

شوفي يا أم و ليد .. أولا أنا أشكرك على حرصك وعنايتك بحشمتك وطاعة ربك عز وجل .. والله تعالى قال للمؤمنات ( ولا يبدين زينتهن ) .. وهذا عام في السفر والحضر .. أمام رجال مسلمين أو كفار .. عرب أو أعاجم …. واليوم مع انتشار الفضائيات والنت أصبح منظر الثوب للرجل والعباءة للمرأة أمراً عاديا تعودت عليه العيون .. بل إني أذكر أني في أوروبا في رمضان وغيره أخرج في شدة البرد من صلاة التراويح علي الثوب والشماغ والمشلح ( الوبر ) أمشي لسكني وأمر ع البقالة وأشتري والناس لا يستغربون لبسي .. بل عااااااادي جدا ..وأنت ترين الحجاب منتشر سواء بتغطية الوجه أو غيره .. وقد تعود الناس على رؤيته ..فاستمري أم وليد على ما انت عليه من الاحتشام .. وكوني جريئة بطلة .. والمؤمن القوي خير وأحب إلى الله من المؤمن الضعيف ..

أم وليد :

طيب يا شيخ دخول المقاهي وأماكن الاختلاط في السفر ؟

الشيخ محمد العريفي :

أم وليد .. هالمقاهي لا تخلو من قوم يشربون الخمر .. ويلبسون اللباس الفاضح .. مع موسيقى صاخبة غالباً .. وهذه أمور تجعل المسلم لا يدنس دينه فيها .. أما إن كان مقهى ليس فيه خمر بل قهوة وشاي بأنواعها .. وجلست مع ولدك أو صاحبتك في مكان على جنب .. فأرجو أنه لا بأس به أما أماكن الاختلاط فإن كانت عامة كالأسواق الكبرى والمطاعم .. وحافظت المسلمة والمسلم ايضا على الحشمة .. فلا بأس ..

أم وليد :

ماشاء الله …الله يبارك فيك ياشيخ ماني بقادره اوصف لك سعادتي بجوابك…طيب سؤال ثاني … حنا بالرياض مقاطعين المنتجات الامريكيه وانا جايه هنا عشان ولدي وليد يدرس بالجامعه وهذا ولدي حسام وملزم الا يبي يدخل مقهى ستار بكس وودي انك توجهه للطريق الصحيح لانه معجب بشخصيتك وراح يسمع كلامك .

الشيخ محمد العريفي :

الله يوفقك .. ويجزيك خير على غيرتك .. القضية يا أم وليد ليست في منتجات أمريكية .. القضية أن ستار بوكس ثبت دعمه للجيش الأمريكي بوسائل متعددة .. فالتعامل مع غيره أولى ..ولا أقول حرام الشراء من ستار بوكس .. لكن غيره أولى .

أم وليد :

اخر سؤال ياشيخ وارجو المعذره .

الشيخ محمد العريفي :

بالعكس خذو راحتكم .

أم وليد :

ودي انك تنصح حسام عشان يصلي الصلاه بوقتها بالسفر وغير السفر ويقول الاذكار .

الشيخ محمد العريفي بابتسامه :

افا ياحسام وراك تأخر الصلاه ؟

حسام بحرج :

اصلي والله العظيم بس اذا كنت نايم اصلي اذا قمت .

الشيخ محمد العريفي :

ولدي حسام .. صلاتك هي أول ما تسأل عنه يوم القيامة .. ومن أهم شروطها صلاتها في وقتها ( إن الصلاة كانت على المؤمنين كتاباً موقوتاً ) أي فريضة موقتة بوقت .. احرص ولدي وتدبر نفسك بأي طريقة للاستيقاظ وصلاتها في وقتها ..

أم وليد :

واذكار الصباح والمساء ياشيخ لانه يستثقل يقولها .

حسام :

ياشيخ صحيح لو اني ماقلت الاذكار بتدوسني سياره او اطيح في بالوعه فيها فيران تاكل وجهي ….لان امي دايم تقولي كذا ؟

ام وليد بحرج شديد :

هههههه ياحليله حسام يمزح .

الشيخ محمد العريفي :

 لا .. عادي .. بس ولدي حسام .. ما فيه شيء في الدين إلا مهم وله حكمة .. ما أمرنا الله تعالى بشيء عبثاً .. ولا علمنا رسولنا صلى الله عليه وسلم الأذكار حتى يتعبنا ويضيع أوقاتنا .. هذي لها فائدة كبيرة .. وتقوي علاقتك بالله تعالى .. وتجعلك مقتدياً بالنبي صلى الله عليه وسلم .. وتحفظك .. وتريح قلبك ..
والأذكار الواردة كثيرة متنوعة .. فاحرص على أهمها ..

ام وليد :

الله يجزيك خير ياشيخ كفيت ووفيت وسامحنا على تعطيلك .

الشيخ محمد العريفي :

حياكم الله بأي وقت .

أم وليد :

 الله يحفظك ويخليك ويبارك فيك..فمان الله .

الشيخ محمد العريفي :

في حفظ الرحمن .

وبعد مغادرة الشيخ :

بدر :

ماشاء الله عليك ياخاله خليتيه يسوي محاضره بالشارع هههههههه .

أم وليد :

والله لو تدري وش كثر ارتاح قلبي من اجابته احس ان الضيقه اللي بقلبي راحت..والحين بمشي رافعه الراس ومرتاحة البال .

بدر :

بشوف لكم مكان على جنب بستار بكس مثل ماقال الشيخ .

حسام :

في مطاعم عربيه هن ؟

ام وليد بهمس :

ياااااارب لك الحمد .

بدر :

هههههه الا في شارع فيه مطاعم عربيه وويقدمون مشروبات ساخنه اذا انت تحبها.

حسام :

انا احب الفرابتشينو .

بدر :

في مطعم يسوي ميلك شيك بالعسل او التوفي راااايق بتكره الفرابتشينو عقبه .

حسام :

اجل مانبي ستار بكس .

واثناء عودتهم للسياره :

نفس الشحات الامريكي :

سكارت سكارت .

أم وليد :

ماخلصنا منه هالعفن .

بدر :

يبي دخان .

أم وليد : قل والله …حسبته يبي شيشه……وراه لاحقنا طيب .

بدر :

هههههههههههههههههههههه .

الشحات الامريكي :

ماي وايف واز كيلد ان ايراك, بت آي ددنت كاير ذات متش, شي واز أقلي اني واي, از أماتر اوف فاكت آي فييل أ بيت اوف غراتيتيود ذيس بيبول, ان اواي ذاي هاف بروفايديد مي ويذ ا هيوج فايفور .هاهاهاهاهاهاهاها .

أم وليد : قبل شوي امه والحين زوجته….وش يقول بالضبط ؟

بدر :

لاتوقفين ياخاله خلك ماشيه بترجم لك …. يقول ان زوجته قتلت في العراق وعادي مو مهتم لانها كانت قبيحه والعراقيين سوه فيه جميل ماينساه لهم .

أم وليد :

هالامريكي فيه عرق سعودي على عربي هههههههه .

بدر :

الرجال كلهم من طينه وحده بالعالم وتفكيرهم واحد .

أم وليد :

موب كلهم عاد مانبي نظلمهم كثيره منهم يجيك زين والبقيه انذال مثل هالامريكي……وش هذا لاحول ولاقوة الا بالله مظاهره ثانيه وش قصتهم مع هالمظاهرات في كل زاويه مظاهره .

بدر :

هذي مظاهره يطالبون فيه بالاستغناء عن النفط عشان مايتنزلون لنا لانهم مايرضون بالذل على قولتهم .

أم وليد :

ودك من يكتب لهم على لوحه كبيره هالجمله ….نحن نعلفكم بالبترول وانتم مثل القطط تأكلون وتنكرون .

بدر :

خخخخخخخخخخخخخخخ والله لو اطاوعك ياخاله ذبحوني الامريكان .

أم وليد :

ماعليك منهم ترى الامريكي جبان لو تقوله تت تت هاجر من البلد .

بدر :

لا مايحتاج انا احب امشي جنب الحيط .

ثم يعودون الى الفندق وفي فجر اليوم التالي :

حسام :

أمي يلا قومي صلي الفجر .

أم وليد :

متى يأذن عندهم ؟

حسام :

 اربع وربع .

أم وليد :

ياربي الساعه ثلاث ونص حرام عليك خلني انام .

حسام :

لاياشيخه !!!

ام وليد تضم حسام :

 هههههههه ياحبي لك يافلذتي يارب تستمر على هالحال يارب…انا صحيت على منبه جوالك .

حسام :

طيب صلي وقولي الاذكار عشان اوديك مطعم ماما جوليا هههههههههههههههه.

النهايه

2 تعليقان

  • فهد صديقي أحسنت قصة شدتني من البداية للنهاية وفكرة فتوى الشيخ محمد رائعة أهنئك بشدة الى الامام دائماً وبالتوفيق

  • موضوع رائع و مدونة جميلة جدا .. بارك الله فيك

إضافة تعليق

(لم يتم نشره.)